Bələdiyyə Novruz bayramı keçiriləcək ərazidə təmir-abadlıq işləri aparıb.

 Novruz yazın gəlişini, təbiətin oyanışını, torpağın, ağacların  dirilişini müjdə verən, əsrlərin süzgəcindən keçən bayramdır. Bu bayram həm də təmizlik, saflıq bayramıdır. Qışdan çıxan xalq həyət-bacanı, ev-eşiyi, pal-paltarı səliqə-sahmana salır, hər şeyi təzələməyə çalışır.
Mingəçevir bələdiyyəsi də ənənəsinə sadiq qalaraq, park və bağlarda təmizlik üçün iməciliyə çıxdı. Novruz bayramı münasibəti ilə ümumşəhər tədbirinin keçiriləcəyi S. Vurğun parkında, parkın qarşısındakı meydanda təmir-abadlıq işləri apardı. Parkın meydana açılan qapı-tağlar, S. Vurğunun əsərlərindən ibarət mozaikalar təmir edildi, yenidən rəngləndi, şairin heykəli yuyuldu, yaşıllıqlar budandı. Bir sözlə, ərazi bayram tədbirini keçirməyə tam hazır vəziyyətə gətirilib.